વિવેકાનંદ પ્રેરણા સેંટરનો ઉનાળુ વેકેશન પ્રકલ્પ : સંકલન

aસ્વામી વિવેકાનંદની ૧૫૦મી જન્મ જયંતીના ઉપક્રમે શ્રીરામકૃષ્ણ આશ્રમ, રાજકોટ દ્વારા સમગ્ર ગુજરાતની પસંદ કરેલી શાળાઓના વિદ્યાર્થીઓને ઉનાળુ વેકેશનમાં એક પ્રકલ્પનું આયોજન કરવામાં આવ્યું હતું. એમાં દિનચર્યા, સ્વચ્છતા અને સફાઈ, બીજાની સેવા માટે જીવવું, સુવિચારોનું મહત્ત્વ, પોતાના જન્મ દિવસની ઊજવણી, અક્ષરદાન, જ્ઞાનદાનનું મહત્ત્વ, વૃદ્ધાશ્રમની મુલાકાત, આગવી કલાનું સર્જન, મારું જીવન ધ્યેય, સ્વામી વિવેકાનંદના બે પ્રેરક પ્રસંગ જેવા વિષયો રાખ્યા હતા. આ પ્રકલ્પ લેખનમાં ૧૫૦૦ વિદ્યાર્થીઓએ ભાગ લીધો. વિદ્યાર્થીઓને સક્રિય રસ લઈને પોતાની પ્રતિભા પ્રમાણે સુંદર પ્રકલ્પ તૈયાર કર્યા હતા. ઘરડાઘરના ‘વડીલોની વ્હાલપ’ પ્રકલ્પમાં એક વિદ્યાર્થીએ ભગવાનની અને વિવેકાનંદની છબી સામે બેસીને આવી પ્રાર્થના કરી, ‘કોઈનાં માબાપે ઘર છોડવું ન પડે, કોઈ માબાપના દીકરા-વહુના વિચારમાં વિકૃતિ ન આવે. હવે પછી ઘરડાઘરમાં માવતરની ભરતી ન થાય.’

૧૫૦૦માંથી શ્રેષ્ઠ ૫૦ કૃતિ અલગ તારવી છે. એટલું કહી શકાય કે આજનાં બાળકોમાં પ્રતિભાની ખોટ નથી. એમની ભીતર રહેલી શક્તિને બહાર લાવવા કોઈકે પ્રેરક અને માર્ગદર્શક બનવું પડે.

એક વિદ્યાર્થીએ હાર ન માનવા વિશેની ગઝલ પંક્તિઓ ટાંકી છે:

હારસે કભી હારો નહીં, કલ જિત મિલેગી

મુશ્કિલોસેં ડરો નહીં, કલ જિત મિલેગી

ડરો નહીં, કુછ કરકે દિખાઓ, શાયદ

અગલે કદમ પર ઉમ્મીદ કી નઈ કિરન મિલેગી