દીપોત્સવી : ગુજરાતમાં શ્રીરામકૃષ્ણ ભાવધારા

(ભાવપ્રચાર કેન્દ્રની પ્રવૃત્તિનો અહેવાલ અહીં આપવા માટે એક કે બે સારી ગુણવત્તાના ફોટા અને ત્રણ-ચાર લાઈનમાં સુસ્પષ્ટ લખાણ સહિત પ્રત્યેક મહિનાની 15 તારીખ પહેલાં srkjyot@gmail.com પર ઇ-મેઈલ કરવા વિનંતી. ઇ-મેઇલનો સબજેક્ટ રાખવો ‘News for Jyot’ -સં.)

 

શ્રીરામકૃષ્ણ આશ્રમ, રાજકોટ

જન્માષ્ટમીની ઉજવણી: શ્રીકૃષ્ણ જન્માષ્ટમી નિમિત્તે 18 ઓગસ્ટ, ગુરુવારે સવારે ભગવદ્ ગીતાના 18 અધ્યાયનો જાપ કરવામાં આવ્યો હતો. તે જ દિવસે સાંજે ભગવાન શ્રીકૃષ્ણની વિશેષ પૂજા, શ્યામનામ-સંકીર્તન અને ભજનો યોજાયાં હતાં. બીજા દિવસે, એટલે કે 19 ઓગસ્ટના રોજ સ્વામી ધર્મપાલાનંદ દ્વારા શ્રીકૃષ્ણના જીવન અને ઉપદેશો પર વિશેષ પ્રવચન કરવામાં આવ્યું હતું.

મૂલ્યલક્ષી શિક્ષણ સેમિનાર: 02.09.2022, 07.09.2022, 09.09.2022 અને 14.09.2022 ના રોજ શ્રીરામકૃષ્ણ આશ્રમ, રાજકોટના વિવેક હોલમાં મૂલ્યલક્ષી શિક્ષણ સેમિનારનું આયોજન કરવામાં આવ્યું હતું. આ કાર્યક્રમમાં ધોરણ 9 અને 11ના 700 જેટલા વિદ્યાર્થીઓએ ભાગ લીધો હતો. કાર્યક્રમોમાં વૈદિક પ્રાર્થના, શાશ્વત મૂલ્યો પર ઓડિયો-વિઝ્યુઅલ પ્રસ્તુતિ અને સ્વામી વિવેકાનંદ અને અન્ય મહાન લોકોના જીવન અને ઉપદેશો પરનાં ભાષણોનો સમાવેશ થાય છે.

શ્રીરામકૃષ્ણ આશ્રમ, રાજકોટ દ્વારા મૂલ્યલક્ષી શિક્ષણ અંતર્ગત 08.09.2022 ના રોજ વાંકાનેરમાં દોશી કોલેજ, કે.કે. શાહ વિદ્યાલય અને એલ.કે. સંઘવી શાળાઓમાં પ્રવચન અને સ્વામી વિવેકાનંદનાં પ્રેરણાદાયી પુસ્તકોનું પ્રદર્શન-વેંચાણનું આયોજન કરવામાં આવ્યું. શાળાના બધા વિદ્યાર્થીઓને સ્વામીજીનો ફોટો આપવામાં આવ્યો. કુલ 1053 વિધાર્થીઓએ લાભ લીધો.

રાજકોટ સેન્ટ્રલ જેલમાં ભક્તિગીત કાર્યક્રમ:

રાજકોટ સેન્ટ્રલ જેલ ખાતે શ્રીરામકૃષ્ણ આશ્રમ, રાજકોટ દ્વારા 03.09.2022 ના રોજ ભક્તિગીતોનો કાર્યક્રમ યોજાયો હતો, જેમાં રાજકોટ સેન્ટ્રલ જેલના પીઆઈ શ્રી પરમારે સ્વાગત પ્રવચન આપ્યું હતું. શ્રીરામકૃષ્ણ આશ્રમ, રાજકોટના અધ્યક્ષ સ્વામી નિખિલેશ્વરાનંદજીએ પ્રેરણાત્મક પ્રવચન આપ્યું હતું. આશરે 2000 કેદીઓએ કાર્યક્રમમાં હાજરી આપી હતી. તમામ કેદીઓને ગુજરાતીમાં ‘શક્તિદાયી વિચાર’ પુસ્તકની નકલ અને બિસ્કીટ ભેટમાં આપવામાં આવ્યાં હતાં. શાંતિ, યોગ, ધ્યાન વગેરેને લગતાં 153 પુસ્તકોનો સેટ જેલના પુસ્તકાલયને ભેટમાં આપવામાં આવ્યો હતો. કેદીઓએ ઉત્સાહપૂર્વક શિસ્તબદ્ધ રીતે કાર્યક્રમમાં હાજરી આપી હતી અને તેમણે ઉત્તમ પ્રતિસાદ આપ્યો હતો.

શ્રીરામકૃષ્ણ આશ્રમ, રાજકોટમાં યુવા સંમેલન:

શિકાગોમાં 11મી સપ્ટેમ્બર, 1893ના રોજ આપેલા સ્વામી વિવેકાનંદના ઐતિહાસિક ભાષણની સ્મૃતિમાં 11મી સપ્ટેમ્બર, 2022ના રોજ ‘સ્વામી વિવેકાનંદ અને આધુનિક યુવા’ વિષય પર યુવા સંમેલનનું આયોજન થયું હતું. આ સંમેલનમાં પ્રબુદ્ધ વક્તાઓનાં પ્રવચનો, સમૂહગીતો, દૃશ્ય-શ્રાવ્ય પ્રસ્તુતિ, અને પ્રશ્નોત્તરી સત્રનો સમાવેશ થયો હતો; જેમાં આચાર્યો અને મહાનુભાવો સહિત 550 યુવાનોએ હાજરી આપી હતી અને લગભગ 1400 લોકોએ આ કાર્યક્રમ ઓનલાઈન માણ્યો હતો.

દીપ પ્રાગટ્ય દ્વારા કાર્યક્રમની શરૂઆત કરવામાં આવી હતી. રાજકોટ શહેરના મ્યુનિસિપલ કમિશનર શ્રી અમિત અરોરા, રાજકોટ જિલ્લા શિક્ષણાધિકારી શ્રી બી.એસ. કૈલા, અને સૌરાષ્ટ્ર યુનિવર્સિટીના ઉપ-કુલપતિ શ્રી ગિરીશ ભીમાણી ઉદ્‌ઘાટન સત્રમાં ઉપસ્થિત રહ્યા હતા અને યુવાનોને સ્વામી વિવેકાનંદના ઉપદેશોને આત્મસાત્‌ કરવા પ્રેરિત કર્યા હતા.

રામકૃષ્ણ મઠ, પુણેના અધ્યક્ષ સ્વામી શ્રીકાંતાનંદજીએ ‘સ્વામી વિવેકાનંદ અને આધુનિક યુવાનો’ પર વક્તવ્ય આપ્યું હતું. નવગુજરાત સમયના મુખ્ય સંપાદક શ્રી અજય ઉમટે ‘સ્વામી વિવેકાનંદની પ્રાસંગિકતા’ પર વક્તવ્ય આપ્યું હતું. પ્રસિદ્ધ ગુજરાતી લેખક અને ભુજના શિક્ષણશાસ્ત્રી શ્રી હરેશભાઈ ધોળકિયાએ ‘આધુનિક યુવાનો માટે સ્વામી વિવેકાનંદનાે સંદેશ’ પર વક્તવ્ય આપ્યું હતું. કચ્છ યુનિવર્સિટીના ગુજરાતી ભાષા-વિભાગના પ્રાધ્યાપક ડો. દર્શનાબહેન ધોળકિયાએ ‘સ્વામી વિવેકાનંદ અને મહિલા સશક્તિકરણ’ પર વક્તવ્ય આપ્યું હતું. રામકૃષ્ણ મઠ, ભુજના અધ્યક્ષ સ્વામી સુખાનંદે ‘આધુનિક યુવા-વર્ગના આદર્શ—સ્વામી વિવેકાનંદ અને મહાવીર હનુમાન’ પર વક્તવ્ય આપ્યું હતું. શ્રીરામકૃષ્ણ આશ્રમ, રાજકોટના અધ્યક્ષ સ્વામી નિખિલેશ્વરાનંદજીએ ‘સ્વામી વિવેકાનંદ અને શિકાગોના વ્યાખ્યાનો’ પર વક્તવ્ય આપ્યું હતું.