શ્વેત ધજાઓ ક્યાં ઝળહળતી અડધે રસ્તે કોને પૂછીએ!
સઘળી કેડી ક્યાં જઈ મળતી અડધે રસ્તે કોને પૂછીએ!
એક સરોવર આંખો સામે, એક સરોવર પીંડી પાછળ
કોને કોની સરહદ છળતી અડધે રસ્તે કોને પૂછીએ!
જે આરસને શિલ્પ કહ્યું’તું એ આરસમાં પ્રાણ ફૂંકાયા
નિજમાં નખશિખ મૂર્તિ મળતી અડધે રસ્તે કોને પૂછીએ!
નહીં મંજીરાં નહીં કરતાલા, શ્વાસ જપે છે તે જપમાલા,
આખે આખી કાયા લળતી અડધે રસ્તે કોને પૂછીએ!
પથ્થર થઈ અશ્વો ઊભા છે મુખમાં હેષા થીજી ગઈ છે
પગમાં પીડાઓ ફળફળતી અડધે રસ્તે કોને પૂછીએ!
જે સાંજોની કાવડ ઊંચકી ક્યાંક પરબનાં પાણી પીધાં
તે સાંજો પણ પાછી વળતી અડધે રસ્તે કોને પૂછીએ!
-મહેન્દ્રભાઈ જોશી
Your Content Goes Here