રામની વાડીએ : ઉશનસ્‌

રામની ભોંયમાં રામની ખેતરવાડીએ જી

આપણા નામની અલગ છાપ ન પાડીએ જી.

જગને ચોકચબૂતરે વેરી રામધણીની જુવાર,

તે પર પાથરી બેઠો તું તો ઝીણી પ્રપંચની જાળ;

ધર્માદા-ચણથી, પંખી ન ઉડાડીએ જી : રામની..

રામની વાડી ગામ આખાની, હોય ન એને વાડ,

બાંધ જો તારું ચાલતું હોય તો આભને આડી આડ;

વાડ કરી આ ક્ષિતિજ ના વણસાડીએ જી : રામની..

રામની વાડી ભોગવવી ભાઈ, હક્કનાં પાઈ નીર,

સૌને વહેંચી ચાખવી આપણે રામનાં ફળની ચીર;

આપણાં ભેળાં સૌનાં ભાણાં માંડીએ જી : રામની…

– ઉશનસ્‌